नांदेड - मतदार यादीतील तांत्रिक त्रुटींमुळे नागरिक हैराण; शहर काँग्रेस कमिटी, माहूरतर्फे प्रशासनाला निवेदन.

नांदेड - मतदार यादीतील तांत्रिक त्रुटींमुळे नागरिक हैराण; शहर काँग्रेस कमिटी, माहूरतर्फे प्रशासनाला निवेदन.

 प्रतिनिधी :मजहर शेख,नांदेड

माहूर,दि :१३:-निवडणूक विभागामार्फत सध्या राबविण्यात येत असलेल्या SIR (Summary Interim Revision) आणि मतदार यादी मॅपिंगच्या प्रक्रियेत गंभीर तांत्रिक त्रुटी निर्माण झाल्या आहेत. यामुळे अनेक पात्र मतदारांची नावे शोधण्यात अडचणी येत असून, नागरिकांमध्ये मोठा संभ्रम निर्माण झाला आहे. या प्रश्नावर आज शहर काँग्रेस कमिटी, माहूरचे शहराध्यक्ष आजीम सय्यद यांच्या नेतृत्वाखाली तहसीलदार यांच्यामार्फत मुख्य निवडणूक अधिकाऱ्यांना निवेदन सादर करण्यात आले.

नेमकी समस्या काय आहे?

प्रशासनाला दिलेल्या निवेदनात म्हटले आहे की, सन २००२ च्या मतदार यादीनुसार सिस्टीममध्ये 'इंडेक्स नंबर' आणि 'सिरीयल नंबर' प्रविष्ट (Enter) केल्यानंतर मूळ व्यक्तीच्या नावाऐवजी दुसऱ्याच त्रयस्थ व्यक्तीचे नाव सिस्टीमवर दिसत आहे (Data Mismatch). तसेच अनेक प्रकरणांमध्ये मूळ यादीत नाव असूनही सिस्टीमवर डेटा शोधला असता तो 'Not Found' दाखवत आहे. यामुळे अनेक पात्र मतदारांची ओळख पटवणे कठीण झाले असून त्यांच्या मतदानाच्या अधिकारावर गदा येण्याची भीती निर्माण झाली आहे.

डिजिटल मॅपिंगमधील चुका:

डिजिटल मॅपिंग प्रक्रियेत मूळ व्यक्तीच्या नावात किंवा वडिलांच्या नावात मोठ्या प्रमाणावर स्पेलिंगच्या चुका किंवा पूर्णपणे वेगळेच नाव अपडेट होत असल्याचे दिसून येत आहे. यामुळे मूळ ओळख आणि डिजिटल रेकॉर्ड यात मोठी तफावत निर्माण झाली असून सामान्य जनतेमध्ये प्रचंड असंतोष आहे.

काँग्रेस कमिटीच्या प्रमुख मागण्या:

१. सॉफ्टवेअर आणि डेटाबेसमधील 'मॅपिंग एरर' आणि 'नाव बदल' ही समस्या तांत्रिक टीमकडून तातडीने दुरुस्त करण्यात यावी.

२. तांत्रिक समस्या सुटेपर्यंत पर्यायी मार्ग म्हणून 'मॅन्युअल पडताळणी' (Manual Verification) प्रक्रियेला परवानगी देण्यात यावी.

३. ज्या मतदारांची नावे 'Not Found' दाखवत आहेत, त्यांच्यासाठी स्वतंत्र हेल्प डेस्क सुरू करावा.

४. दुरुस्तीसाठी कागदपत्रांची पडताळणी करताना २००२ च्या मूळ छापील यादीलाच अंतिम आधार मानण्यात यावे.

यावेळी शहर काँग्रेस कमिटीचे पदाधिकारी आणि कार्यकर्ते उपस्थित होते. निवडणूक प्रक्रियेची पारदर्शकता टिकवण्यासाठी प्रशासनाने या गंभीर समस्येवर तातडीने तोडगा काढावा, अशी मागणी आजीम सय्यद यांनी केली आहे.