नगर-कल्याण राष्ट्रीय महामार्गाच्या कॉंक्रिटीकरणामुळे प्रवाशांचे हाल; माजी खासदार सुजय विखेंच्या सूचनांनंतर प्रशासनाची तातडीने कार्यवाही
पारनेर/प्रतिनिधी :
नगर-कल्याण राष्ट्रीय महामार्गावर सध्या कॉंक्रिटीकरणाचे काम जोरात सुरू आहे. मात्र, या कामामुळे प्रवाशांना जीव मुठीत धरून प्रवास करावा लागत आहे. रस्त्याच्या मध्यभागी लावलेले आडवे गज, अपुऱ्या सूचनाफलकांमुळे आणि कामाच्या अनियोजित पद्धतीमुळे अपघातांचे प्रमाण वाढले आहे. यामुळे वाहतूक कोंडी ही नित्याची बाब झाली आहे. स्थानिक नागरिकांनी यासंदर्भात वारंवार तक्रारी केल्या होत्या. या तक्रारींची दखल घेत अहमदनगर जिल्हा परिषदेचे माजी उपाध्यक्ष सुजित झावरे पाटील आणि पारनेर पंचायत समिती सदस्या सुप्रिया अमोल साळवे यांनी हा मुद्दा माजी खासदार सुजय विखे यांच्या निदर्शनास आणला. यानंतर सुजय विखे यांनी तात्काळ कार्यवाही करत राष्ट्रीय महामार्ग प्राधिकरणाच्या वरिष्ठ अधिकाऱ्यांना सूचना दिल्या, ज्यामुळे कामाच्या ठिकाणी सुधारणा सुरू झाल्या आहेत.काही कार्यक्रमानिमित्त पारनेरच्या दौऱ्यावर असताना सुजय विखे यांनी स्वत: या रस्त्याने प्रवास केला. यावेळी त्यांना रस्त्यावरील खड्डे, आडवे गज आणि कामाची अनियोजित पद्धत यामुळे प्रवाशांना होणारा त्रास प्रत्यक्ष अनुभवाला आला. त्यांनी तात्काळ राष्ट्रीय महामार्ग प्राधिकरणाच्या वरिष्ठ अधिकाऱ्यांशी फोनवर संपर्क साधून या समस्यांबाबत सविस्तर चर्चा केली. रस्त्यावरील गज त्वरित हटवणे, सूचनाफलक लावणे आणि कामाच्या ठिकाणी प्रवाशांच्या सुरक्षिततेची काळजी घेण्याच्या स्पष्ट सूचना त्यांनी दिल्या. या सूचनांची अधिकाऱ्यांनी तात्काळ दखल घेतली. महामार्गावर काम सुरू असलेल्या भागात आडवे गज हटवण्याचे काम सुरू झाले आहे. तसेच, सूचनाफलक लावण्यास सुरुवात झाली असून, प्रवाशांच्या सुरक्षिततेसाठी आवश्यक उपाययोजना केल्या जात आहेत. या त्वरित कार्यवाहीमुळे प्रवाशांना काहीसा दिलासा मिळाला आहे.सुजित झावरे पाटील आणि सुप्रिया साळवे यांनी ही समस्या सुजय विखे यांच्या निदर्शनास आणून दिल्याने आणि त्यांनी तात्काळ लक्ष घालून प्रशासनाला कार्यवाहीस भाग पाडल्याने स्थानिक ग्रामस्थ आणि प्रवाशांनी त्यांचे आभार मानले आहेत. एका स्थानिक प्रवाशाने सांगितले की, आमच्या तक्रारींकडे अनेक दिवस दुर्लक्ष होत होते. पण सुजय विखे यांनी तात्काळ पावले उचलल्याने आता रस्त्यावर काही सुधारणा दिसू लागल्या आहेत. नागरिकांनी या कामाच्या गुणवत्तेवर आणि गतीवर लक्ष ठेवण्याची गरज असल्याचे मत व्यक्त केले आहे. रस्त्याचे कॉंक्रिटीकरण पूर्ण होईपर्यंत प्रवाशांच्या सुरक्षिततेसाठी प्रशासनाने सातत्याने काळजी घ्यावी, अशी मागणीही त्यांनी केली आहे. सुजय विखे यांनी यापुढेही या कामावर लक्ष ठेवण्याचे आश्वासन दिले आहे.या घटनेमुळे सुजय विखे यांच्या तत्परतेचे आणि जनतेच्या समस्यांप्रती असलेल्या संवेदनशीलतेचे कौतुक होत आहे. स्थानिक नेते आणि नागरिकांनी एकत्रितपणे केलेल्या प्रयत्नांमुळे प्रवाशांना लवकरच या महामार्गावर सुरक्षित आणि सुलभ प्रवासाची अपेक्षा आहे.
श्री.अनिल जाधव, वय - 35,राहुरी,जि.अहमदनगर.*सी २४तास - महाराष्ट्राची अत्याधुनिक आणि परिपुर्ण वृत्तवाहिनी सी 24 तास जगा वर्तमानात बिनधास्त*